সেই সময়ত তেজপুৰ কাৰমেমৰিয়েল প্ৰাথমিক বিদ্যালয়খনৰ বাহিৰে তেজপুৰত আৰু কোনো প্ৰাথমিক বিদ্যালয় নাছিল। সেয়ে বৰাদেৱে  ১৯৩৩ চনত বাৰহলীয়াৰ নিজৰ চ'ৰাগৃহতে কেইজনমান ছাত্ৰ-ছাত্ৰী লৈ প্ৰথম বিদ্যালয় হিচাপে আৰম্ভ কৰে।  লাহে লাহে মাজগাঁও, বৰুৱা চুবুৰী, বামুণগাঁও, কমাৰ চুবুৰী, মুঢ়াতেতেলী, কলিবাৰী, কছাৰীগাঁও আদি ওচৰ-চুবুৰীয়া অঞ্চলৰ পৰাও দুই-চাৰিগৰাকী ছাত্ৰ-ছাত্ৰী আহিবলৈ লোৱাত তেখেতৰ চ'ৰাগৃহত ঠাইৰ অসুবিধা হোৱাৰ লগতে অকলেও ছাত্ৰ-ছাত্ৰীসকলক পঢ়াব নোৱৰা হ'ল। সেইবাবে সেই সময়ৰ  তেজপুৰ পৌৰসভাৰ সভাপতি ৺আনন্দচন্দ্ৰ আগৰৱালাদেৱৰ সহযোগিতাত হাতী-পিলখানাৰ চৰকাৰী মাটিত থকা তেজপুৰ পৌৰসভাৰ এটি অব্যৱহৃত টিঙৰ দীঘল ঘৰলৈ বিদ্যালয়খন স্থানান্তৰিত কৰা হয়। লগতে তেজপুৰ চহৰৰ নিকটৱৰ্তী বৰঝাৰ গাঁও শ‌ইকীয়া চুবুৰী নিবাসী প্ৰয়াত শ্ৰদ্ধাৰ বেণুধৰ শ‌ইকীয়াদেৱক বিদ্যালয়খনৰ প্ৰতিষ্ঠাপক আৰু প্ৰধান শিক্ষক হিচাপে দায়িত্ব অৰ্পণ কৰা হয়। নতুন গৃহটিলৈ স্থানান্তৰিত হোৱাৰ দিনা ১৯৩৫ চনৰ ২২ আগষ্ট আছিল। সেই দিনাই বিদ্যালয়খনৰ নতুন গৃহটিৰ দ্বাৰ উন্মোচন কৰে সেই সময়ৰ ডিপিআই স্মল চাহাবে। তেখেতে উন্মোচনী সভাত এই বিদ্যালয়খনৰ নাম ৰাখে "চিলভাৰ জুবিলী প্ৰাথমিক বিদ্যালয়"। সেই সময়ত তেতিয়াৰ সম্ৰাট পঞ্চম জৰ্জৰ কাৰ্যকালৰ ৰূপালী জয়ন্তী (Silver Jubilee) উৎসৱ সমগ্ৰ ভাৰততে পালন হৈ থকাৰ লগত সংগতি ৰাখি এই বিদ্যালয়খনৰ নাম চিলভাৰ জুবিলী প্ৰাইমাৰী বিদ্যালয় বুলি নামাকৰণ কৰে। স্মল চাহাবে বিদ্যালয়খন পৰিদৰ্শন কৰি বহীত এই বিষয়ে এটা টোকা লিখি থৈ যায়। পৰিদৰ্শন টোকাৰ বহীৰ পৰা জানিব পাৰি যে বিদ্যালয়খনত প্ৰথম অৱস্থাত ১৯৩৫ চনত ৮১ গৰাকী ছাত্ৰ-ছাত্ৰী, ১৯৩৬ চনত ১১৬ গৰাকী ছাত্ৰ-ছাত্ৰী, আৰু ১৯৩৭ চনত ১৩১ গৰাকী ছাত্ৰ-ছাত্ৰীলৈ বৃদ্ধি হৈছিল।

এই বিদ্যালয়খনৰ প্ৰতিষ্ঠাপক প্ৰধান শিক্ষক প্ৰয়াত বেণুধৰ শ‌ইকীয়াদেৱে অহোপুৰুষাৰ্থ কৰি বিদ্যালয়খনক অসমৰ ভিতৰতে এখন শ্ৰেষ্ঠ বিদ্যালয় হিচাপে প্ৰতিষ্ঠা কৰিলে। বৰ্তমান বিদ্যালয়খনৰ ছাত্ৰ-ছাত্ৰীৰ সংখ্যা ৮৫৬ গৰাকী। প্ৰতি বছৰে ১৫০ৰ পৰা ২০০ গৰাকী ছাত্ৰ-ছাত্ৰীৰ নামভৰ্তি নকৰাকৈ বহুতো অভিভাৱকক ঘূৰাই পঠিয়াবলগীয়া হয়।